Bizitzari Eusteko Erronka

Esku artean daukazun argitalpen honetan, iraultzaileak diren 24 zaintza esperientzia aurkezten dizkizugu. Guztiek -bakoitzak bere esparruan eta bere erara- pertsonen eta planetaren bizitza lehenetsi eta berau zaintzeko ardura hartu dute. Eta hori al da iraultza? galdetuko diguzu. Ba bai, horixe berori eta besterik ez.

Izan ere, InteRed-en, aktibismo modu honi “Zaintzen Iraultza” esaten baitiogu1. Ez da jendez beteriko iraultza bat, ezta bat-batekoa ere eta ez da albistea komunikabide nagusietan. Eta, hala ere, Iraultza esaten diogu, gure gaur egungo gizarteetan nagusiak diren pentsamolde eta jokabide nagusiak erabat eraldatzen baititu.

Zehazkiago, aurkezten dizkizugun esperientzia guztiek ondorengo aktibismo moduak partekatzen dituzte:

1) Gure ekonomia-garapen eredu kapitalistari aurre egiten die. Hau da, merkatua, dirua eta norbanakoaren aberastasunaren protagonismoari uko egiten die eta, aldiz, taldearen ongizatea eta guztiok “bizitzea merezi duen bizitza” bizi dezagun lehenesten dute. “Bizitzea merezi duen bizitza” hau giza-komunitateari loturik dator nahitaez, “planetan bizi garen pertsona guztiak bizi gaitezen ongi” bati. Eta, arlo materiala eta kontsumoari dagokiona erabat gaindituz, pertsonen arteko erlazioak, hala nola naturarekiko erlazioak eta bertan bizi garen izaki ororekiko erlazioak aintzat hartu eta lehenesten ditu.

Ondorioz, 24 esperientziek jartzen dituzte mahai gainean “zaintzen krisia”, “ingurumen krisia”, “zor ekologikoa”, “zaintzen zorra”, “zaintzen gizarte antolaketa”, “zaintzen feminizazioa”, “zaintzen mundu mailako kateak” edo “zaintzen pobrezia” bezalako kontzeptuak .

2) Zaintzen gizarte antolaketa berri bat aldarrikatzen dute. Zaintzei berriro ere beren balioa emateaz eta haiek berrantolatzeaz askoz haratago, merkatuak erdigunetik kendu eta hauek bizitzaren zerbitzura jartzea da aldarrikatzen dutena, honela gure gizarteak bizitzaren beraren eta bizitzaren zaintzaren inguruan antola ditzagun.

3) Herritartasun zaintzailea garatzen dute beren eguneroko jardunean. Gizartea eraldatzeko gizartean parte hartzea funtsezkoa dela ulerturik, “pertsonala dena politikoa da” eta “kolektiboki pentsatu, pertsonalki eragin” leloak bere egiten dituzte eta herritartasun zaintzailea gauzatzen dute, hau da, nahitaez guztion zaintzarako eskubideari lotuta datorren herritartasun mota.

InteRed-en ere Zaintzen Iraultza honetan ekintzaile izaten jarraitu nahi dugu. Hori da, hain zuzen, argitalpen honen helburua. Esperientzia hauen ekarpenak, lorpenak eta erronkak ezagutarazten badizkizugu, zuri ere Zaintzen Iraultza honetara gehitu zaitezen indarra emango dizugunaren itxaropena daukagu. Eta zure bizitzan, zure proiektuetan, zure elkartean, era iraultzailean zaintzailea izango zarenaren itxaropena. Guztion indarrak bat eginik bakarrik lortuko baitugu benetako Zaintzen Iraultza.