Intered. Pedagogía de los cuidados
ES | EU |
YouTube
ZAINTZEN PEDAGOGIAK, GORPUTZ, EMOZIO, KOGNIZIO ETA ERLAZIOEN ALDEA INTEGRATZEA SUSTATZEN DU

 

Integrazio hori behar dugu errespetuz, konfiantzaz eta osotasunez erlazionatzeko. Gaur egun, korronte pedagogiko asko saiatzen dira pertsonaren lau maila horiek bateratzen, hazi eta heldutasunera iritsi ahal izateko. Zaintzen Pedagogia ere horretan ahalegintzen da.

 

 

Gorputza

Zaintzen Pedagogiak hezkuntzaren eta pertsonaren ikuspegi holistikoa aurkezten digu. Garena izan ahal izateko gure burua zaintzeak eskatzen du gure burua garen horretan osotasunean onartzea. Hezur-haragizko izakiak, izaki gorpuzdunak beste gorputz batzuen erdian, izate material kontziente bat partekatzen, energia-trukeko harremanetan, hori baita bizitzak daukan forma. Horrenbestez, hezkuntzak ezin du bere planteamenduan gorputza alde batera utzi. Hezkuntzako lehen mailetan, bereziki Haur Hezkuntzan, argiago dago, baina prozesuak aurrera egin ahala, gorputza garrantzia galtzen doa eta adimenarekin loturiko jarduerak lehenesten dira.

Goi-mailako hezkuntzak baztertu egiten du gorputza heziketarako lekua izan daitekeenik. Nolabait hezkuntza ez-formalean berreskura dezakegu gorputzaren alderdi hori, jolasarekin edo adierazkortasunarekin loturiko metodologiak proposatzen ditugunean. Baina edozein dela ere gure hezteko modua, kontuan izan behar dugu gorputza, gorputz-kontzientzia eta gorputz-harremana zaintzaren osagai modura.

 

 

 

Emozioa

Emozioa, tradizioz emakumeei egotzia, jakintza pertsonal eta kolektiboaren iturri funtsezkoa da bizikidetzarako, zaintzarako eta garapen osorako. Arestian ere aipatu dugu beharrezkoa dela emozioen mundua aintzat hartzea, balioestea eta heztea; norberaren ezagutza, adierazpena, entzutea, enpatia eta prestasuna garatzea. Metodologien moduluan hainbat proposamen aurkituko ditugu, Arte-terapiaren, antzerkiaren eta jolasaren bidez. Hemen ere zenbait aipatzen ditugu: gorputzarekin eginiko lana, garbiketa eta hizkuntza, zirkulu lotesleak, ipuinak.

Kognizioa

Pertsona osoak eta zoriontsuak izateko, politikoki eta moralki herritar eta subjektu aktibo izateko eta geure bizitzen sortzaile izateko ikasi egin behar dugu, eta ikasi beharreko hori ikasteko baldintzak bilatzen ari gara. Horretarako, jakintza emantzipatzailea, osoa, diziplina-artekoa eta holistikoa behar dugu. Jakintza horrek bermatu egin behar du bizitzaren iraunkortasuna; norberaren eskubideak zein diren jakitea eta duintasun pertsonalaren kontzientzia barne-bildu behar ditu, eta zaintzeko eta maitatzeko ardura izan behar du ardatz. Eta aukera eman behar digu irabazi-irabazi hautuari bide emateko (eta ez irabazi-galdu hautuari, transakzio horietan hezi izan baikara orain arte).

Harremanen alderdia

Harreman afektibo osasuntsuak, lotura seguruak bilatzen ditugu. Hezkuntza, oroz gain, erlazioa da. Errealitatea erlazioa da. Zaurgarritasunean eta elkarrekiko behar horretan zainduak eta onartuak izatea behar dugu. Besteen epairik gabeko onarpena behar dugu, kide izatearen kontzientzia eta arau eta erregela, balio eta esanahien mundu bat, errespetua oinarrian dela.

 

Dokumentu osoa: Zaintzen Pedagogirako haziak, Malen Alvarez

 

 

 

 

 

 

Aurreko bidalketa Boluntariotza ikastaroa Hurrengo bidalketa Zaintzen Iraultzaren Astea
Menua